「威廉，輝輝跌親呀！」
我成日都會諗，如果新世代嘅小朋友只係可以學習一種技能嘅話，咁應該就係「急救」。
但係市面上偏偏仲未有為小學、甚或幼稚園小朋友設計嘅急救課程。
唔通小朋友就唔會受傷？唔通小朋友受傷嘅時候，就只係應該等大人嚟照顧佢哋？大家諗下，如果每個小朋友都識基本嘅急救技巧，咁喺有需要嘅時候幫到自己同其他人囉？
講返個故事吖，檢查過輝輝（化名）嘅傷勢後，評估過由於小朋友傷勢較輕，喺呢個情況下，威廉就決定把握機會同小朋友上咗一課簡單嘅「野外急救」。
咁究竟如果同小朋友去野外玩嘅時候唔小心整親，我地又應該點樣處理呢
1）安慰傷者：
「唔駛擔心呀，輝輝，無事㗎！」大叫三次；
2）檢查傷勢：
如果為小朋友檢查過後，發現傷口只係好細或者好淺，可以唔駛即時好緊張處理，等到返到屋企沖完涼後再幫小朋友抹乾傷口，傷口就會自然癒合，好快又可以繼續玩架喇；
3）處理傷勢：
但係如果傷口較大、較深，或者小朋友覺得傷口好大，急救員都應該即時處理傷勢。處理傷口嘅時候可以先以清水沖洗傷口上嘅異物（如泥沙樹葉）並以乾淨敷料（如急救用紗布）抹走，然後就可以貼上膠布以遮蓋傷口；
跟據經驗，卡通膠布對小朋友嘅傷勢有較佳（心理上）嘅痊癒力，但係記得注意小朋友嘅喜好呀，例如「車王」對大部分男仔嚟講，成功率較高架；
4）補上促進復原「咒語」：
小朋友可能會好驚痛，大人應給予耐性、體諒同陪伴，同小朋友一同經歷面對受傷嘅感受，同學習應該點樣處理，唔應該怪責或者意圖控制小朋友嘅情緒，記得要盡量避免「收聲呀！唔喊啦！小小嘢！」呢啲責備同忽略小朋友情緒嘅說話呀。如果有需要，仲可加上「咒語」配合，同小朋友一齊講「無事無事無事嘅！」，安撫佢哋嘅情緒
5）如傷勢真係需要進一步治療，大人就唔好太放心，仲諗住慢慢諗「咒語」喇，快啲搵醫療人員處理啦
學習急救，面對受傷，從而學懂照顧自己，應該係每一個新世代小朋友都必須要掌握嘅技巧同態度。
備註：
1）遊沐創辦人 - 威廉為急救講師及野外急救教練
2）以上以輕鬆手法分享，並非標準指引，請大人因應小朋友狀況而調協
小編按：以上為活動回顧