近日慢慢重新有機會，帶大小朋友返回大自然，前兩日嘅參加者係一班少數族裔年青人。
一如既往，我到指定地點停頓，以泥土同參加者分享如何「欣賞大自然」。我喺參加者面前搽喺雙手同塊面，甚至輕輕食一啖泥土，再問參加者「洗頭水、汽水充滿化學物，研究證明對人體有害，但大家都會搽上身，放入口，對比泥土，邊個好啲？」（如有見過我咁做嘅，請留言+1）
好多人認為泥土係污糟，唔願意摸佢，更唔會直接坐喺泥土上，「污糟架嘛！」。其實，泥土係大家用好多錢買嘅「有機」物質，對人體無害不特止仲好有益。研究證明，泥土裏面嘅各種微生物有助於提升人嘅免疫力，可減少過敏同氣喘機率，仲會增加大腦血清素，讓人更快樂。
喺森林療癒嘅終點，有一位印度裔嘅女孩子同我分享:
「William, I’ve found so many great mud with different colours and shapes, I am so happy!」
佢話佢細個喺印度可以搵到類似相中嘅唔同形狀同顏色嘅泥土，泥土令佢諗起老家同兒時回憶。呢位女孩子係我見過最識欣賞泥土嘅參加者，佢嘅分享亦令我好感動。
趁著疫情稍稍緩和，俾自己去大自然散散心，親手接觸下泥土，讓泥土分享快樂俾我哋啦。