成日話「風雲變幻無常」，但小朋友嘅圖畫書上，一舊舊雲好可愛，同現實世界好似唔係好同喎？當我哋想小朋友去學習大自然嘅一切時，不如直接帶佢哋去親身感受吓啦！
今次帶小朋友上大帽山近頂，位處800米高，適逢當日低雲壓致雲層偏低，到目的地時，我地同雲層幾乎身處同一高度？喺我哋坐低休息一陣時，有小朋友大叫「後面有好大舊黑雲嚟緊呀！好驚呀！」。
透過天文台測量資料及導師經驗判斷安全後，威廉決定同小朋友一齊留喺原地，讓雲穿過我哋身邊，親身感受風雲嘅力量。
我哋一齊迎接風同雲強大嘅推力，大人要同小朋友合力互相支撐，先可以力挺唔俾風雲推倒。風聲喺耳邊拍打，我哋要好大聲叫喊出嚟先可以互相溝通。小朋友以為會有大雨傾盆而下，慌亂咁著好雨褸先發現「無雨嘅？」，原來細心觀察，雲雖然厚黑，但未至於會有雨水落下。
大人小朋友共同感受，望住風雲喺我哋身邊穿過流走，慢慢遠去，或升高或降低，一時卷動，然後又化作輕霧茫茫散去。我哋都知道，啱啱過去嘅經歷，只有一齊親身感受嘅我哋先可以明白。風雲變幻無常，我哋體驗過。
小編按：以上為活動回顧